09年7月16日，我和RICKY兩條友由彩虹殺入西貢。由於路途崎嶇，所以事先無同大家講，怕完成唔到就無謂啦... 但係完成過後，發現難度極高，而且有一定危險性，所以不放到其他版塊，以免缺乏輪滑經驗或常識的新手以為這是一個簡單的任務。 報導開始： 往飛霞路與清水灣道交界 晚上7時30分，多雲天陰，無月亮，溫度約29度。 我與RICKY於彩虹地鐵站出發，我們於清水灣道公共運輸站換鞋出發，我們二人用的都是FR1。
出發後，我們沿清水灣道上斜，一直向新清水灣道進發，首個休息點是飛霞路與清水灣道交界的路口，路程約2公里，路段全為上斜，從地圖看這段路共上了200米。由於全程上斜，實在上到爆偈....
如果勉強講，我地已經到左西貢～
往嘉澍路 休息過後，下個休息點係嘉澍路，共1.5公里，但係呢段係最難行路段，4大問題：窄、斜、暗、爛。 暗的原因為樹會擋住街燈，令人難以看到路面情況。 此段路為1.5公里，但係頭一半係平路，之後一半足足上左150米....真係未上過咁既斜度.... 爛...爛到不能再爛...窄，窄到只係得三尺，但係可以分左三物料去鋪....
之後又係休息的時間，去到呢刻已經係爆偈邊綠....但係最甘果段現在先來...
往壁屋 一路都係上斜，之後呢段係最斜喇，由嘉澍路上壁屋監獄。 路長1公里，頭段一半係平路，之後0.5公里狂上約100米....如果在彩虹講句斜路頂見，咁呢度就係斜路頂.... 來到這裏已經係晚上8:30。
RICKY依然好氣好力....
呢段路總長約4公里，如以一個常人於平路步行，時速正是4公里，但係呢段上斜路我地用ROLLER代步卻都要1小時....可想而知有幾慢.... 到達壁屋，上斜的路終於走完，之後就是「頭文字R」，瘋狂的落斜。 往清水灣道及西貢公路交匯處 上斜靠體能、落斜靠技術，去到壁屋我其實已經爆偈，如果再上一定訓低....
之後我們需要由壁屋去清水灣道與西貢公路交匯處，全程約1.4公里，但係要狂落150米.... 當中最大難度係落斜轉急彎，而且路好窄，要減速要以T剎為主，S形走法為副。全段斜度平均，所以無任何位置可以以平溜緩減速度，呢段係全段彩虹至西貢最危險的路段，當我們下了6分鐘就要休息，比上斜要休息的時間來得更快。主因是要長時間收緊肌肉去減速，好快腳軟。
一路落，一路轉...
落到中間要抖抖。
連休息在內，我們用了20分鐘去完成這一段... 休息及整裝 我們去到交匯處，需要走過行人天穚到對面，去到天穚底RICKY D轆已經變成「蛋撻」，所以要左右調轉。
往南圍 整理過後我們又再上路，之後呢段係由交匯處去南圍，從前好多非法賽車會在這段路作賽道，原因為夠斜夠直，但係去到斜路底轉個急左彎....
呢段全程約1.5公里，落足140米，由於已經耗費大量體力，我同RICKY抖左兩次，總共休息左20分鐘.... 休息中
這就是最下方的急彎，落到泥都已經戰死...
去到南圍，RICKY本來蝕埋一面經過反轉後的轆已經蝕埋另一面....
最後RICKY都係炒左野。
去到蠔涌，呢度就係斜路底，如果由壁屋講句：「斜路底見....」咁要成個鐘先再見，來到蠔涌已經晚上9時35分.....
往白沙灣 離開蠔涌，我們往白沙灣出發，之後的路段己經再無大上大落，全程平路。 來到這裏實在係已經上晒落晒一年要上落既斜路.... 這段最大的問題係路窄，有D位窄到連著波鞋行過都有難度。
離開白沙灣，前方就是波蘿輋，條路其在太窄。
入城
見到呢個牌，就知已經完成9成路段~~
之後就係入市中心，段路全程落斜，但係比起之前實在小巫見大巫。呢段路闊、斜度一段，可以唔洗「拖」住落，順溜就可以，況且已經無力再停...
見到「滿記」就知入城成功!!!!
之後向碼頭出發~
最後去到巴士站旁換鞋，已經係晚上10點...
兩對助我地完成旅程的FR1~
HK-ROLLER.COM西貢之旅，完滿結束~
晚飯 之後同RICKY去晚飯，慶祝一下二人無穿無爛，平安到達終點~
後記
完成這次旅程實在不容易，我的體力只是很一般，頭段上斜真係爆偈....好運的是天氣尚算清涼，沿途有風。 在出發之前已經心知難走，但無想到如此誇張，由其落斜一段，長時間減速實在對體力同技術有好大要求。這段路一定要輪滑者本身技術和經驗非常充足才可成行，在路途上其實自保已經不易，更不要妄想可以保護身邊人，這段路就算用HK-ROLLER最大奧義都無用... 你問我下次幾時再踩，我會話我有排都唔再踩，因為我總覺得與別人同行是有責任去照顧同行者，但呢段路我已經無法做到，所以我不會輕易再由彩虹入西貢，也勸各位想清楚才決定是否參照以上路線自行發起。
最後睇埋段片，睇下我地路上的情況同聽下RICKY有乜野發表？？？
|
Powered by Discuz! X3.4
© 2001-2017 Comsenz Inc.
