| 8月28就係「香港自由式輪滑公開賽2016」呢個除左係各位高手大展拳腳嘅時候 亦都係滾軸溜冰教練及愛好者們試試自己身手嘅好機會 點解咁講？ 因為當中最簡單嘅項目就連睇緊呢篇文章嘅「你」都參加到！ 唔好覺得自己唔係香港隊唔係高手就係陪跑 你絕對有資格參賽甚至有機會攞獎 因為公開組別係只限非香港隊人士參加 睇睇有邊三個比賽項目： A) 雙足S形繞樁 - 男/女子組 (小童組 / 少年組 / 挑戰組* / 公開組*) 每組上限30人 B) 速度繞樁 - 男/女子組 (少年組 / 青年組 / 挑戰組* / 成年組 / 公開組*) 每組上限30人 C) 花式繞樁 - 雙人組(不設年齡及性別限制)；男/女子組 (少年組 / 青年組 / 成年組) (當中打左個*號嘅組別係禁止香港隊隊員參加) 先講講雙足S形繞樁係點玩法： 故名思意係雙腳以S形路線鬥快穿過10個樁 每個樁之間相隔120CM  呢個項目就最簡單 正常係個ROLLER場入面行到兩個圈嘅朋友 比少少心機練下已經可以參加 另一個項目就係速度繞樁 速度繞樁就比雙足S形繞樁難少少 係要單腳以S形路線鬥快穿過20個樁 每個樁之間相隔80CM  呢個項目比起雙足S就需求高少少 不過如果你本身基本功OK嘅話 用呢一個半月時間練單腳S嘅話 其實要過哂20個唔難, 係, 其實唔難 有時間黎下我地逢星期四晚係維園聚會 大家可以指點下你 好喇最後一個係花式繞樁 花式繞樁就係要喺3行分別間距50CM, 80CM, 120CM既樁之間 在2分鐘內伴隨音樂做出不同花式  呢個項目就真係要學開嘅朋友先參加得喇 因為第一參加者要識唔同嘅招數(花式) 之後又要將所有招數編排落一條COMBO入面 出黎個效果又要好睇又要配合音樂 所以冇返咁上下造詣或者唔係有學開 都真係排唔到2分鐘COMBO出黎 不過就算你參加唔到呢個項目都好 有時間不妨去欣賞一下選手精彩嘅比賽 包你大開眼界！ 唔好覺得「比賽」呢兩隻字咁遙不可及 其實你都可以係其中一個選手 香港自由式輪滑公開賽２０１６ 詳情 |
Powered by Discuz! X3.4
© 2001-2017 Comsenz Inc.
